Jab main chhota tha, toh kabhi kabhi school se ghar paidal jaaya karta tha...

…Kabhi kabhi bus na leke, ghanto bus stand pe baitha rehta tha.

Sadko ko bas dekhte rehna, ek jagah apni nigaah chipka lena...woh anjaan nazare, woh awaazein…jin mein se ek bhi maine chuni nahi thi, unse mujhe ek alag sa sukoon milta tha!

Thoda bada hua, phir baitha nahi jaata tha.

Ab sab chalte chalte dekhne laga...Par ab kaan mein gaane baj rahein hote the.

Nazare ab bhi the, bas aawazein maine chun li thi.

Mujhe hamesha logo se baatein karna achha lagta tha. Par aur bada hone ke baad, baatein karne ki wajah badal si gayi.

Ab dusro se baatein karte waqt hi main khud se baat kar paata hoon!

Varna akele mein, jaane anjaane, haath phone ki taraf badh hi jaata hain.

'Phone chhod do', 'sab tumhare haath mein hain'...sab pata hain, sab padha hain, sab samajh bhi aata hain...

Phir agle pal agla post dhyan khinch leta hain!

Pehle lagta tha meri kaam-chori hain...

Phir ehsaas hua ke jab kaam bohot mushkil ho ya sar pe kisi aur ki thopi gayi deadline na ho, tab haath zyada begaboo ho jaata hain.

Ajeeb hain na...maine mera phone khud chuna hain. Uske andar ka har nazara, har awaaz - mere apne haathon se chuni jaati hain.

Par itna azaad hoke bhi itna nirbhar kabhi nahi mehsoos hua!

Aisa lagta hain jaise koi kahin mujhe bandee bana baitha hain.

Ab kuch na karne mein bechaini hoti hain, ab sadak ki awaazein boring lagti hain, ab nazaro mein sirf gandagi aur dhuan dikhayi deta hain.

Kahin, khud se baat karne ki woh aadat chhoot gayi hain!

Kahin ek lat lag gayi hain. Jo dikhti hain waisi nahi - waisi jis se sab pidhit hain par koi jaanta nahi.

Yahaan tak ke yeh baat bhi main ek post mein hi likh raha hoon aur kuch ki palo mein aap ka dhyan agla post khinch lega...